O centro cultural Marcos Valcárcel foi escenario hoxe do acto de clausura e entrega de diplomas aos participantes no programa de creación e consolidación de empresas especializado en xestión agrícola, gandeira e forestal.
Unha iniciativa da Cámara de Comercio de Ourense, o Inorde e a Fundación Incyde, co cofinanciamento do Fondo Social Europeo, impartido dende a primavera pasada a máis dunha vintena de emprendedores e empresarios da provincia nas instalacións do Centro de Desenvolvemento Agrogandeiro de Xinzo de Limia.
No acto de clausura, no que se presentaron dous dos proxectos desenvolvidos neste programa, estiveron presentes o presidente do Inorde, José Manuel Baltar, o presidente en funcións da Cámara de Comercio de Ourense, Juan Carlos Parada, e o director xeral da Fundación Incyde, Javier Collado.
O programa de xestión agrogandeira e forestal, pioneiro en España, foi o primeiro dos dous programas de creación e consolidación de empresas que Cámara Ourense, Inorde e Fundación Incyde tiñan previsto impartir este ano.
De feito, o próximo día 29 de setembro comeza a segunda destas iniciativas, esta vez de carácter xenérico e á que xa se sumaron unha vintena de emprendedores e empresarios.
|